يالا يا جماعة نرمي فلوس في الارض، فلوس كتير قوي قوي، مش منظرة ولا حاجة ده عشان الmake up artist، صاحبتي جابتها بعشرة و نيرمين جابت دينا كارتيزيان ب ١٢ ألف بس..
لأ ماهو أنا بقي لازم يبقي معايا فلوس كتير قوي عشان يقولوا عليا جيبتلها وجيبتلها، أمال ابقي راجل جامد ازاي، هي الرجولة ايه غير عربية جامدة أشد بيها، أو انزل منها وانا لابس نضارة شمس و عضلات…من الاخر عريس لقطة البنات هاتموت عليه؟!
سيبكم من كل ده أهم حاجة الفرح فين …عشان وانا بعزم اصحابي اقولهم في المكان الفلاني الفظيع المريع
والفستان يبقي يهبل والناس لما تشوفه تقول واو، ساعتها هحس اني Princess في نفسي.
أحنا نطلع الساحل نتصور بلبس الصيف الhot و نجيب لايكات و حركات. مش منظرة ولا حاجة بأمانة أصل الصيف جه مانصيفش يعني؟!
كل حاجة في الشقة لازم تبقي خلصانة حتي لو ده هيضغطنا نفسيا. انت عايزهم لما ييجوا بعد الفرح يتفرجوا علي الشقة يقولوا علينا ايه؟! (ملحوظة: احنا الشعب الوحيد في العالم اللي عنده التقليد الغريب والمريب ده)
وبعد كدة بنخش علي طول في مرحلة الماميز ، اللي لما باشوف كلامهم اونلاين ببجيلي ارتفاع في ضغط الدم واحتباس في جميع اعضائي.
احنا فعلا بقينا شعب مريض ، ولا عجب اننا من الtop rating دايما في الاكتئاب..
بنعرف نعمل فرح بس ما بنعرفش نتجوز
بنلبس كويس لكن مابنعرفش نكون علاقات
بناكل في اماكن جامدة لكن مش بنعيش
كل الصور المزيفة دي مش بتثير جواك الseratonin وال dopamine اللي بيشتغلوا كمضادات طبيعية للاكتئاب، عقلك فاهم كويس قوي انك بتحاول تخدعه هو شخصيا قبل ما تخدع الناس و مش عارف تخدع الاتنين. هو فاهم ده ومش بيستجيب للمسخرة دي تماما.
كأنك عايش في فرح والناس كلها معازيم بيتفرجوا عليك ويقيموك، وانت فاقد وقتك وطاقتك ومجهودك ونفسيتك، كل ده بس عشان تعجبهم.
ثقافة مجتمع أهم حاجة فيه: الناس هتاكل وشنا، والناس هتقول علينا إيه.
ادمان تفكيرك في الناس ساحب طاقتك و تركيزك، ومش مخليك مستمتع بحياتك.
مرة قررت اني هقعد اسبوع مافكرش في منظري قدام الناس تماما، في الاسبوع ده تقريبا اتولدت من جديد؛ حمل كبير قوي نزل من علي كتفي و حسيت بانطلاق و حرية.
فهمت ساعتها هما لية برة عايشين بجد واحنا هنا بنمثل اننا عايشين.
كل اللي بتمناه انك تجرب التجربة دي ولو مرة واحدة في حياتك، صدقني انا مستخسر انك تكون عشت كل حياتك ومجربتش الاحساس ده ولو مرة واحدة بس…انسي الناس و جرب تعيش.
