الشاعر صفوت فريز يكتب جرب مرة تعيش محروم

جرب مرة تعـيـش محروم
من حاجة وكان نفسك فيها
عشــت ســنينك تحلم بيـها
ومستنيها
بس خسـارة الحظ معاندك
فاتح بابك ولاجـاش عندك
ولا حود أصلاً فى الجيههة
جرب
جرب مرة ودوق الذل
من أقرب ناسك وحبايبك
طاعنينك دايماً وف قلبك
وعارفين غُـلبك
ناسيينك دايماً فى الفرحة
فاكرينك ف مواقف جارحة
وإن كان عاجبك
جرب
جرب لما تكون محتاج
والدنيـا بترفـض تديـلك
واقع مش لاقى اللى يشيلك
مهدود حيلك
تاية بائس وسط همومك
والقادر حواليـك هايلومك
مش هايفيدك
جرب
جرب يمكن يوم تعذرنى
وتعرف إنى قاسيت وتعبت
ومن أصناف المر شربت
وإتعذِبت
غصباً عنى القلب إتغير
من أمر المخاليق متحير
منهم شـِبت