صاحب مسيحى قالى
اسمع يا شاعر يالى
كلماتك كلها وطنية
مين المسيحى تملى
قبل ما يحكيلى الحكاية
قالى المكسب فى النهاية
سطرت ورقى كشاعر
قولت اكتب حروف البداية
المسيحى مش بيخاف
أصله ياما شاف
ده مهما بيحصل فيه
مش بينكسرله مجداف
ايه يعنى يموت مقتول
شئ عادى كمان معقول
كده كده ميت ميت
مهما العمر يطول
مكسب الدنيا عنده خسارة
أصل الأبدية جميلة و سارة
شوفت بقى بيحسبها ازاى
هيه دية بقى الشطارة
مش بتفرق ابدا معاه
الموت عنده حياة
فى لحظة وداع الدنيا
كأنه لقى طوق نجاه
مش بتفرق عنده كتير
هيموت صغير ولا كبير
أصل الدنيا بالنسباله
هوا دخان بيطير
اهم حاجة فى دنيته
ميخسرش ابدا ابديته
مكسب بعد الموت
هية كل حياته و قضيته
كلمات : محمد فتحى
